ياصباح الخير
ياصباح الخير يسعدك ربي من صباح
الصباح اللي تهيا به الوجه السميح
يالطيف الروح بعدك على سمٍ ذحاح
ليت نضراتك تعلمك عني بالصحيح
ياقراح البيض كان البني فيهن قراح
اشهد ان زولك مليحٍ ونطوقك مليح
كل شيٍ قد جمعته على الدنيا وباح
غير حبك يااريش العين لايبيح
سمان الهرج
انا وين ابلقا يلاجاويد فاعل خير
حريصٍ على سر المحبين لرسلته
امنول لواصبر عام مابان بي تاثير
وهالحين حتى صبر يومين ماحتلته
انا مثل صقار ٍ تولع بحب الطير
ولف قلبه فروخ الصواريم وهبلته
تولعت في فرخٍ قضيبٍ يتل السير
ابي لمحةٍ من نظرة الحر واسبلته
صغير بسنه غير عندي ماهو بصغير
يامغلاه في قلبي وياكبر منزلته
اجمع له سمان الهرج خوفٍ من التقصير
ولاجيت بشرح له كلامي تهيزلته
يجيني منه هيبه سحا تقدير
اقابله عندى علم واروح ماقلته
لزوم الطيبين
ياوجودي يالله انك تزينها تزين
كلما ظنيت لي ظن خابن الظنون
والله اني مااعتذر من لزوم الطيبين
وان عسرني فالمطاليق دايم يعذرون
لانهم زد حدهم وقتهم ومجربين
مرةً يلقون ومرار مايلقون لون
في الخلا عندي زباد ٍ ونيمة ياسمين
خير من ترحيب ناسٍ ماغير يجاملون
اتلذذ بالخلا من عدات الغايبين
واجتماع الي يقولون ما لايفعلون
مرخصين انفوسهم وابخلا مستكبرين
دايم من دون في دون حتى ينفدون
انا ابدوي
اناعشت بالشدات ماعشت بعنايه
وصحيح اني بدوي لياقلتوا ابدوي
عطاني زماني من تجاريبه اكفايه
وعرفت الخطا والصح والنقص واللوي
وبرق لي على الضيحه كما برق مرايه
ووردني سرابٍ من طمع فيه ماروي
وبراني كما برى القلم وسط برايه
ونزع مني اخلاقي وخلاني بدوي
فترى الناس ماكلٍ يبي ينوخذ رايه
ولاكل من جاب المواريد ماغوي
ولاكل حيدٍ تنقله يصلح بنايه
ولاكل جدرٍ لاتراكيت به قوي
ولاكل من صادقت تبدي له الغايه
ولاكل من يضرب فجوج الخلا خوي
موضوع: من روائع بن جدلان 
الجمعة مايو 09, 2008 12:20 pm